મોઢામાં ચાંદા પડવા આમ જો તો ખૂબ જ સામાન્ય બીમારી છે, પણ શરૂઆતમાં દિવસોમાં તેની પીડા જમતી વખતે તેમજ બોલતી વખતે ખૂબ જ હેરાન કરી શકે છે. ચાંદા માટે એક વાત બહુ જ સારી એ છે કે મોટે ભાગે તે ૭ થી ૧૪ દિવસમાં મટી જ જાય છે. પણ પીડાદાયક દિવસો દરમિયાન શું કરવું. ચાલો જાણીએ.
વિષયસૂચિ
ચાંદા પડવાના કારણો
- મોઢામાં ચાંદા પડવાના ઘણા બધા કારણો હોય શકે છે, મુખ્ય કારણો જોઈએ તો, કોઈ પણ પ્રકારની ઇજા, જેમ કે કોઈ અણીદાર ખાવાની વસ્તુથી ઇજા,
- એકદમ ગરમ વસ્તુથી દાઝી જવું,
- કોઈ કેમિકલથી દાઝી જવું જેમ કે પાનમાં એકદમ તેજ ચૂનો
- કોઈ કારણોસર શરીરની રોગપ્રતિકારક શક્તિ ઓછી થઈ જાય તો પણ ચાંદા પડી શકે છે
- કબજિયાત, પાંડુરોગ, માનસિક તણાવ જેવી તકલીફોને કારણે વારંવાર ચાંદા પડી શકે
- ઢીલા ચોકઠાથી ચાંદા પડી શકે
મોઢામાં ચાંદા પડે તો શું કરવું?
- ખાટું તેમજ તીખું ખાવાનું ટાળવું
- ચાંદાને બ્રશથી કે ચમચીથી અડવાનું ટાળો.
- મેડિકલ સ્ટોર્સ પરથી મળતી ચાંદાને ખોટું કરવાની ક્રીમ વાપરી શકાય
- મીઠાવાળા પાણીથી કોગળા કરી શકાય. મીઠું કુદરતી રીતે એન્ટિસેપ્ટિક તરીકે કામ કરે છે.
- દાંત પર બ્રશ હળવા હાથે કરવું. ચાંદા પડ્યા છે, એટલે બ્રશ કરવાનું ટાળવું નહીં.
ચાંદા માટે દાંતના ડૉક્ટરને કયારે મળવું જોઈએ?
મોટે ભાગે ચાંદા ૭ થી ૧૪ દિવસમાં મટી જ જાય છે. તેમ છતાં નીચેની પરીસ્થિતિમાં નિષ્ણાત ડોક્ટરની સલાહ લેવી જોઈએ.
- ચાંદા ૩ અઠવાડિયા પછી પણ ના મટે.
- ચાંદાની સાથે સાથે તાવ આવતો હોય અને અસહ્ય પીડા થતી હોય.
- ચાંદા આખા મોઢામાં ફેલાઈ ગયા હોય.
- પ્રવાહી પીવામાં પણ તકલીફ થતી હોય
- ખૂબ જ મોટી સાઇઝનું ચાંદું પડ્યું હોય
- વારંવાર મોઢામાં પડતાં અલ્સર માટે જો કબજિયાત, એનેમિયા કે શરીરની અન્ય કોઈ બિમારી જવાબદાર હોય તો તેના માટે જે તે યોગ્ય નિષ્ણાંત ડૉક્ટરને બતાવવું જોઈએ.
- ૧ મહિનાથી ચાંદું પડ્યું હોય, મટતું ન હોય અને એમાં કોઈ પણ જાતનો દુખાવો ન થતો હોય ( જી, હા, ન થતો હોય) તો દાંતના ડૉક્ટરને બતાવવું જોઈએ, તે મોંઢાના કેન્સરનું ચાંદું હોઇ શકે છે.
